وروستی
د چاپېریال ساتنې او ملګرو ملتونو د پراختیایي ادارو تر منځ د همکاریو د پیاوړتیا په هکله بحث وشو
د کب ۳مه – کابل
د چاپېریال ساتنې ملي ادارې عمومي رئیس شاه زمان میوندي د شنبې په ماسپښین د کب په ۳مه په خپل کاري دفتر کې د ملګرو ملتونو د پراختیايي ادارې له رئیس عبدالله الداردي سره وکتل.
په دې لیدنه کې د چاپېریال ساتنې ملي ادارې د پالیسۍ او نړیوالو اړیکو معین ادریس ملیار هم شتون درلود چې له اقلیمي بدلون سره د مبارزې او چاپېریالي موضوعاتو د اهمیت په تړاو بحث ترسره شو.
د چاپېریال ساتنې ملي ادارې عمومي رئیس له اقلیمي بدلون سره د مبارزې په برخه کې د دې ادارې هڅو ته په کتو د نړیوالو سازمانونو د همکاریو په پراختیا ټینګار وکړ.
په دې کتنه کې د نړیوالو منابعو په خاصه توګه د اقلیم زرغون صندوق د مالي مرستو جذبولو د مشخص مېکانېزم پر جوړولو او ګډو هڅو ټینګار وشو؛ همدا راز دواړو لوریو د ګډې همکارۍ ژمنه وکړه.
ښاغلي عبدالله الداردي ژمنه وکړه چې د چاپېریالي پالیسۍ د پراختیا او ظرفیت جوړولو په برخه کې به له چاپېریال ساتنې ملي ادارې سره همکاري کوي.
دا په داسې حال کې ده چې افغانستان په وروستیو دوو کلونو کې د فعالې چاپېریالي ډيپلوماسۍ په درلودلو او د اقلیمي بدلون سره د مبارزې او نړیوالو مرستو د جذبولو په برخه کې ترټولو غوره کاري دوره تجربه کړې ده.
خبریال: عبدالولي عابد
عکاس: سید امید سادات