وروستی
د چاپېریال ساتنې لپاره د ملي پالیسۍ جوړونې مشورتي غونډه ترسره شوه
د چاپېريال ساتنې ملي ادارې د چاپېريال ساتنې لپاره د ملي پاليسۍ طرحې د چمتووالي او ودې به تړاو له خپلو کاري شريکانو سره د بحث او د نظرياتو د وړاندې کولو په موخه نن دوشنبه، د روان کال د مرغومي مياشتې په ۲۳مه نېټه د يادې ادارې د کول حشمت خان د غونډو په تالار کې غونډه وکړه.
په دې ناسته کې د چاپېريال ساتنې ملي ادارې عمومي رئيس شاه زمان ميوندي، د يادې ادارې د پاليسۍ او نړيوالو اړيکو معين ادريس مليار، مالي او اداري معين محمد يوسف حميديان، په افغانستان کې د ملګرو ملتونو د چاپېريال ساتنې پروګرام (UNEP) دفتر رئيس محمد حسنين، د دولتي او نړيوالو ادارو او بنسټونو استازو او همدارنګه د چاپېريالي چارو متخصصينو ګډون درلود.
ناسته د چاپېريال ساتنې ملي ادارې عمومي رئيس شاه زمان ميوندي په وينا سره پيل شوه او وروسته له هغې ټول ګډونوال په څو ګروپونو کې په بېل بېل ډول سره ووېشل شول او په اجندا کې د شاملو موضوعاتو به اړه يې بحث وکړ او خپل نظريات يې شريک کړل.
د چاپېريال ساتنې ملي ادارې عمومي رئيس شاه زمان ميوندي د خپلو خبرو په ترڅ کې د چاپېريال ساتنې په برخه کې د جامع او ملي پاليسۍ د لرلو په اهميت ټينګار وکړ. ښاغلي ميوندي وويل: د چاپېريال ساتنې ملي پاليسي يو ملي ضرورت دی، چې ټولې چاپېریالي پاليسۍ او طرزالعملونه د هغه په رڼا کې ترتيب کېږي.
نوموړي د چاپېريال ساتنې ملي ادارې سره د ملي او نړیوالو بنسټونو او شرکاوو له همکارۍ مننه وکړه او ويې ويل، چې د چاپېريال ساتنې ملي پاليسۍ طرحې د مسودې جوړولو لپاره د چاپېريالي چارو اړوند متخصصينو، علمي بنسټونو او د چارو پوهانو په همکارۍ ټول چمتووالی نيول شوی دی. د چاپېريال ساتنې ملي ادارې عمومي رئيس د خپلو خبرو په لړ کې وويل: دا پاليسي درې پړاوونه لري: (چمتووالی، وده او تطبيق ) او اساس يې د افغانستان د سولې او پراختيا ملي چارچوب، د تلپاتې پراختيا موخې او د ذيدخلو شرکاوو مشورې جوړوي.
ښاغلي ميوندي د چاپېريال ساتنې ملي پاليسۍ د غنامندۍ په پار د دولتي ادارو ترمنځ يې همکاري او همغږي مهمه وګڼله او ويې ويل: د دې پاليسۍ د انکشاف او تطبيق پړاوونو لپاره ژمنتيا او غښتلي ملي هوډ ته اړتيا ده او د ذيربطو ادارو ترمنځ د قوي همکارۍ او همغږۍ پرته د هېواد چاپېريالي ننګونو مديريت شونی نه دی.
له هغه وروسته په افغانستان کې د ملګرو ملتونو د چاپېريال ساتنې پروګرام (UNEP) رئيس محمد حسنين خبرې وکړې او د چاپېریال ساتنې ملي پاليسۍ طرحې د برنامې جووړونې په برخه کې يې د چاپېريال ساتنې ملي ادارې رهبرۍ له همکارۍ څخه مننه وکړه. نوموړي ژمنه وکړه چې په اړوند برخو کې به په افغانستان کې د ملګرو ملتونو د چاپېريال ساتنې پروګرام دفتر د دې پاليسي د طرحې او تطبيق په برخه کې همکاري کوي.
ويل کېږي چې په دې برخه کې د ټولو متخصصینو او د مسوولو بنسټونو د نظرياتو له بشپړولو څخه وروسته به د چاپېريال ساتنې ملي اداره د چاپېريال ساتنې ملي پاليسۍ د ودې په تړاو له ټولو نظرياتو او ګټورو کړنلارو څخه ګټه پورته کړي.