وروستی
۴ ولایتونو کې د چاپېریال ساتنې په موخه نظارتي فعالیتونه ترسره شول
۱۴۴۸ کال د ربیع الأول۱۰مه نېټه/ ولایتونه
د کابل، کندهار، ننګرهار او لغمان ولایتونو کې د چاپېریال
ساتنې ریاستونو له لوري د چاپېریال قانون او مقرراتو د تطبیق، د ککړتیاوو د مخنیوي
او د طبیعي سرچینو د ساتنې په موخه یو لړ نظارتي او چاپېریالي وضعیت د ارزونیې
فعالیتونه ترسره شوي دي.
په کابل کې د چاپېریال ساتنې ریاست د طبیعي میراثونو عمومي
مدیریت له لوري د نایابو او کمیابو مرغانو د ښکار د مخنیوي او د ریاستالوزرا د
عالي مقام د حکم د تطبیق په موخه د تهیه مسکن بازار څخه نظارت ترسره شو. د بازار
له دوکاندارانو سره د وحشي ژوو او مرغانو د ناقانونه ښکار، پلور او ساتنې د منع په
اړه لازمې سپارښتنې وشوې او له متخلفینو سره د قانوني چلند خبرداری ورکړل شو.
ننګرهار کې د چاپېریال ساتنې ریاست د ارزونې ټیم د نازیانو
ولسوالۍ اړوند د پیکو ناو په سیمه کې د ډبرو د استخراج او پروسس له یوې قراردادي
ساحې څخه چاپېریالي ارزونه ترسره کړه. د فعالیت وضعیت وکتل شو او مسؤلینو ته د چاپېریالي
نیمګړتیاوو د حل، د قوانینو د رعایت او د ککړتیاوو د مخنیوي په اړه لازمې لارښوونې
وشوې.
کندهار کې د چاپېریال ساتنې ریاست د نظارت او تفتیش عمومي
مدیریت له لوري په درېیمه او څلورمه ناحیه کې له دوو موټر شویانو څخه لیدنه وشوه.
مسؤلینو ته د چاپېریالي جواز د ترلاسه کولو او د مستعملو اوبو د مدیریت لپاره د معیاري
سیستم د جوړولو په اړه سپارښتنې وشوې.
همداراز، په لغمان کې د چاپېریال ساتنې ریاست د نظارت او
تفتیش ټیم له یو شمېر یخ جوړولو فابریکو څخه لیدنه وکړه او د تولیدي ساحو پاکوالی،
د اوبو او ضایعاتو مدیریت، د کثافاتو راټولول او انتقال، د کاري چاپېریال وضعیت او
د کارکوونکو حفظالصحې وڅېړل شوه.
د یادو نظارتونو په ترڅ کې د اړوندو فعالیتونو مسؤلینو ته د
چاپېریال ساتنې د اصولو او مقرراتو د عملي کولو په اړه لازمې لارښوونې ورکړل شوې
او هغوی د چاپېریالي معیارونو د رعایت او موجوده چاپېریالي ستونزو د حل په برخه کې
د همکارۍ ژمنه وکړه.