وروستی
د ننګرهار د چاپېریال ساتنې ریاست او امیر علي شیر نوایي پوهنتون ترمنځ د ګډو همکاریو تفاهملیک لاسلیک شو
۱۴۴۸ کال د ربیع الأول۱۰مه نېټه/ ننګرهار
د ننګرهار ولایت د چاپېریال ساتنې ریاست او امیر علي شیر
نوایي خصوصي پوهنتون ترمنځ د چاپېریالي پوهاوي د پراختیا، علمي څېړنو، نوښتونو او
د محصلینو د عملي زدهکړو د پیاوړتیا په موخه د ګډو همکاریو تفاهملیک لاسلیک شو.
دغه تفاهملیک د ننګرهار ولایت د چاپېریال ساتنې ریاست په
مقام کې د یاد ریاست د رئیس قاري احسانالله مختار او د امیر علي شیر نوایي
پوهنتون د ښوونې او روزنې پوهنځي د رئیس دوکتور عبدالبصیر منظور ترمنځ لاسلیک شو.
په دې غونډه کې د ننګرهار ولایت د چاپېریال ساتنې ریاست یو
شمېر مسؤلینو او کارکوونکو، د امیر علي شیر نوایي پوهنتون د ښوونې او روزنې پوهنځي
رئیس او د پوهنتون یو شمېر استادانو او کارکوونکو ګډون کړی وو.
د ننګرهار ولایت د چاپېریال ساتنې رئیس قاري احسانالله
مختار د تفاهملیک د لاسلیک پر مهال وویل، چې د چاپېریال ساتنه یوازې د دولت دنده
نه ده، بلکې علمي، ښوونیزې او ټولنیزې ادارې او عام خلک هم باید په دې برخه کې
فعاله ونډه واخلي.
نوموړي زیاته کړه، چې د ننګرهار ولایت د چاپېریال ساتنې ریاست
د دغه تفاهملیک عملي کېدو ته ژمن دی او هڅه کوي له شته امکاناتو څخه په استفادې د
چاپېریال ساتنې په برخه کې لا ډېر او اغېزناک فعالیتونه ترسره کړي.
قاري احسانالله مختار همداراز د پوهنتون د محصلینو لپاره د
چاپېریال ساتنې ریاست ته د عملي زدهکړو او مسلکي تجربو د ترلاسه کولو زمینه
برابرول مهم وبلل او ویې ویل، چې د محصلینو نږدې تعامل له اړوندو مسلکي ادارو سره
کولای شي د هغوی نظري زدهکړې له عملي تجربو سره وتړي.
بلخوا، د امیر علي شیر نوایي پوهنتون د ښوونې او روزنې پوهنځي
رئیس دوکتور عبدالبصیر منظور د دواړو لورو ترمنځ د ګډو همکاریو پر ارزښت ټینګار وکړ
او ویې ویل، چې دغه ډول همکارۍ د محصلینو د علمي او مسلکي ظرفیتونو په لوړولو کې
مهم رول لري.
نوموړي د تفاهملیک د عملي کېدو په برخه کې د پوهنتون ژمنتیا
څرګنده کړه او زیاته یې کړه، چې د علمي بنسټونو او اړوندو دولتي ادارو ترمنځ همغږي
کولای شي د علمي څېړنو، نوښتونو او مسلکي زدهکړو د پراختیا لپاره اغېزمنې پایلې
ولري.
د دغه تفاهملیک له مخې به دواړه لوري د چاپېریالي پوهاوي د
پراختیا، علمي او مسلکي ظرفیتونو د لوړولو، ګډو څېړنو او نوښتونو د پیاوړتیا او
محصلینو ته د نظري او عملي زدهکړو او کاري تجربو د ترلاسه کولو په برخه کې ګډ
فعالیتونه ترسره کوي.
مسؤلین باور لري، چې د دغې همکارۍ دوام به د چاپېریال ساتنې
په برخه کې د عامه پوهاوي د لوړولو ترڅنګ، د مسلکي بشري ظرفیتونو په روزنه او د
سالم او خوندي چاپېریال په رامنځته کولو کې اغېزناک تمام شي.