وروستی
د خصوصي ژوبڼونو او نسلګیرۍ مرکزونو جوړیدو د څرنګوالي په تړاو مشورتي غونډه وشوه
۱۴۴۸کال د صفرالمظفر ۲۷مه نېټه/ کابل
د
چاپېریال ساتنې عمومي ادارې له لوري نن سهشنبه د ۱۴۰۵کال د زمري په ۲۰مه نېټه د دې ادارې د بند امیر
غونډو په تالار کې د ریاست الوزراء عالي مقام د ۲۴/۱۰/۱۴۴۷ نېټې (۷۱۵۶) ګڼه حکم د تطبیق په تړاو د اړوندو
ادارو له استازو سره مشورتي غونډه وشوه.
یاده
غونډه د دې ادارې د طبیعي میراثونو د ساتنې رئیس حامد صافي په مشرۍ ترسره شوه چې
پکې د بهرنیو چارو، مالیې، کورنیو چارو، کرنې، اوبو لګولو او مالدارۍ، اطلاعاتو او
کلتور او اقتصاد وزارتونو، د استخباراتو لوی ریاست، کابل ښاروالۍ، د ا.ا.ا د چارو
ادارې لوی ریاست او د ښاروالیو چارو د سمون عمومي ریاست استازو ګډون کړی وو.
غونډه
د قرآن عظیم الشان مبارکو آیتونو په تلاوت پیل شوه ورپسې د دې ادارې د طبیعي میراثونو
د ساتنې رئیس حامد صافي د وحشي ژوو د اهمیت، د شخصي ژوبڼونو او نسلګیرۍ مرکزونو د
جوړولو د څرنګوالي او مدیریت په تړاو خبرې وکړې او د اړوندو ادارو له استازو یې غوښتنه
وکړه چې د ذکر شوو موضوعاتو د مثبت او منفي اړخونو په پام کې نیولو سره خپل نظرونه
او وړاندیزونه له دې ادارې سره شریک کړي.
د دې
ادارې د پلان او پالیسۍ رئیس اجمل مرتضوي هم د یادې موضوع حقوقي او قانوني اړخونه
تشریح کړل او د حکم په اړه یې ګډونوالو ته وضاحت ورکړ.
د
کابل ژوبڼ رئیس عزیزګل ثاقب د خصوصي ژوبڼونو او نسلګیرۍ مرکزونو د جوړیدو د څرنګوالي
په هکله هر اړخیزې خبرې وکړې او زیاته یې کړه چې د خصوصي ژوبڼونو جوړیدل په
افغانستان کې نوې تجربه ده؛ خو په نړۍ کې ناکامه تجربه ده چې د نړۍوالو معیارونو
په پام کې نیولو سره باید ورته جدي پاملرنه وشي او د باصلاحیته بورډ لخوا مدیریت
شي.
د غونډې په لړ کې د خصوصي ژوبڼونو او نسلګیرۍ مرکزونو د جوړیدو په تړاو ګډونوالو خپل نظرونه او وړاندیزونه ورکړل، خصوصي ژوبڼونو ته د جواز ورکولو په تړاو هر اړخیز بحث او خبرې وشوې او پرېکړه وشوه چې په دې تړاو جوړ شوی لارښود دې په دقیق ډول وکتل شي او د غونډې ګډونوال دې د لارښود د لا غني کولو لپاره خپل نظرونه او وړاندیزونه له ادارې سره شریک کړي.
د یادونې
وړ ده چې په افغانستان د ا.ا.ا د واکمنیدو سره په هېواد کې سراسري امنیت ټینګ شوی
او پانګوال لېواله شوي چې په بېلابېلو برخو کې پانګونه وکړي او د خصوصي ژوبڼونو او
وحشي ژوو د نسلګیرۍ مرکزونو جوړیدو ته د خلکو پام اووښتی چې په دې برخه کې د کوم
قانوني سند د نشتون له امله د چاپېریال ساتنې عمومي ادارې لخوا یاده موضوع د
اسلامي امارت ریاست الوزراء عالي مقام ته وړاندیز شوه چې د یاد حکم په اساس به د یادې
موضوع د څېړنې او ارزونې لپاره د اړوندو ادارو استازو په شمول کمېټه مؤظفه شوې؛ ترڅو په دې برخه کې لازم اقدامات وکړي.