وروستی
د وحشي ژويو خوندیتوب او ځنګلونو د ساتنې په موخه په کونړ کې دوه کمېټې جوړې شوې
۱۴۴۸ کال د صفر المظفر 19مه نېټه/ کونړ
د کونړ ولایت د چاپېریال ساتنې ریاست له لوری به دانګام
ولسوالۍ کې د وحشي ژويو خوندیتوب او ځنګلونو ساتنې په موخه دوه کمیټې جوړې شوې.
د يادو کمیټو د غونډې جوړيدو پر مهال د دې ولسوالۍ مسؤلینو
ترڅنګ د مختلفو کلیو قومي مشرانو، ملکانو، ځوانانو، دهقانانو او چوپانانو ګډون کړی
وو.
د غونډې په لړ کې چاپېریال ساتنې، د ځنګلونو او وحشي حیواناتو
د ارزښت، د طبیعي سرچینو د ساتنې، د اقلیم بدلون د اغېزو او د ولسي همکارۍ د ارزښت
په اړه ګډونوالو ته هر اړخیز معلومات او عامه پوهاوی وړاندې شو.
همدارنګه
د وحشي ژویو د خوندیتوب او ځنګلونو د ساتنې د کمېټو د طرزالعمل، قوانینو او
مقرراتو په اړه مفصل معلومات ورکړل شول او د کمېټو د غړو د دندو، مسؤلیتونو او
صلاحیتونو اړوند لازمې لارښوونې وشوې.
د یادو کمیټو لپاره له هرې سیمې څخه دوه ـ دوه تنه د غړو په
توګه وټاکل شول، ترڅو د خپلو سیمو په کچه د ځنګلونو د ساتنې، د وحشي حیواناتو د
ناقانونه ښکار د مخنیوي، د چاپېریالي ستونزو د راپور ورکولو او د عامه پوهاوي په
برخه کې اغېزمن رول ولوبوي.
د کمېټو غړو ته سپارښتنه وشوه چې د چاپېریال ساتنې ریاست او
اړوندو ادارو سره په بشپړه همغږۍ خپلې دندې ترسره کړي، د طبیعي سرچینو د ساتنې
لپاره عملي اقدامات وکړي او د ځنګلونو او وحشي حیواناتو د خوندیتوب په برخه کې د
ولس او حکومت ترمنځ د همغږۍ د پیاوړتیا لپاره هڅې وکړي.