وروستی
ولایتونو کې د مختلفو فعالیتونو چاپېریالي وضعیت و ارزول شو
۱۴۴۸ کال د محرم ۱۲نېټه/کندهار-ننګرهار-لغمان-خوست
په فعالیتونو کې د چاپېریالي اصولو د تطبیق په موخه د تېرو
دوو ورځو په لړ کې د کندهار، ننګرهار، لغمان او خوست ولایتونو د چاپېریال ساتنې ریاستونو
مفتشینو له لوري د مختلفو صنعتي او تولیدي فعالیتونو د چاپېریالي وضعیت څارنې او
ارزونې ترسره شوې دي.
د کندهار دامان ولسوالۍ لنډي کاریز سیمه کې د یو شمېر ګچو
تولیدي کارخونو؛ ننګرهار او لغمان کې د تیلو پمپ سټېشنونو او همداراز خوست ښار کې
د یو شمېر چرګانو فارمونو د چاپېریالي وضعیت او فعالیتونو د څرنګوالي څارنه او
ارزونه ترسره شوه.
دغه
نظارت او ارزونه د فردي او چاپېریالي حفظالصحې د ساتنې، د ککړتیا لاملونو د تشخیص،
د ککړونکو منابعو د تثبیت او د هغوی د کنټرول او مخنیوي په موخه ترسره شوه.
د چاپېریالي چارو نظارتي ټیمونو له لوري د یادو فعالیتونو
مالکینو او مسوولینو ته د چاپېریال قانون، اصولو او مقرراتو په هکله پوهاوی ورکړل
شو؛ موجوده چاپېریالي ستونزې ور وښودل شوې او سپارښتنې ورته وشوې چې خپل فعالیتونه
معیاري او چاپېریال ساتنې ته جدي پاملرنې وکړې چې د فعالیتونو مسوولینو یې د عملي
کیدو ژمنې وکړې.