وروستی
لغمان کې د سمسورتیا د پراختیا په برخه کې د قوریه لرونکو اتحادیې مشرتابه او غړو هڅې وستایل شوې
۱۴۴۷ کال د ذوالحجې ۲۴نېټه/لغمان
د لغمان ولایت د چاپېریال ساتنې ریاست له لوري د نیالګیو کېنولو موسم پر مهال د سمسورتیا د پراختیا په برخه د یاد ولایت د قوریه لرونکو اتحادیې د مشرتابه او غړو د اغېزمنو فعالیتونو او لاسته راوړنو د قدردانۍ په موخه ځانګړې غونډه جوړه شوه، چې په ترڅ کې یې د اتحادیې مشرتابه او غړي په ستاینلیکونو ونازول شول.
د غونډې په پیل کې د لغمان ولایت د چاپېریال ساتنې رئیس حاجي احمدشاه ابراهیم وینا وکړه او ویې ویل: «د مثمرو او زینتي نیالګیو کېنول او د شنو سیمو پراختیا د چاپېریال ساتنې له مهمو موخو څخه دي، ځکه نیالګي د هوا د ککړتیا په راکمولو، د اکسیجن کچې په لوړولو، د اقلیم په ښه والي، د تودوخې په راکمولو، د خاورې د تخریب په مخنیوي، د باراني اوبو په جذب، د سیلابونو د خطر په کمولو او د مرغانو او نورو ژوو لپاره د مناسب استوګنځای په برابرولو کې مهم رول لري. همدارنګه د ښارونو او کلیو ښکلا زیاتوي، د خلکو د فزیکي او رواني روغتیا په ښه والي کې مرسته کوي او د تفریح او ټولنیزو فعالیتونو لپاره مناسب چاپېریال رامنځته کوي.»
ورپسې د قوریه لرونکو اتحادیې په استازیتوب استاد محمد اسحق پیکان خبرې وکړې او ویې ویل چې د لغمان ولایت د قوریه لرونکو اتحادیې غړي هر کال په سلګونو زره مثمر، غیرمثمر او زینتي تصدیق شوي او اصلاح شوي نیالګي په مسلکي ډول تولیدوي.
ښاغلي پیکان زیاته کړه چې دغه نیالګي نه یوازې د لغمان ولایت د خلکو اړتیاوې پوره کوي، بلکې د هېواد بېلابېلو ولایتونو ته هم لېږدول کېږي، چې د شنو سیمو په پراختیا، د چاپېریال په سمسورتیا او د هېواد په ځانبسیاینې کې ارزښتناک رول لري.
د غونډې په پای کې د لغمان چاپېریال ساتنې ریاست د رئیس او کارکوونکو له لوري د قوریه لرونکو اتحادیې د مشرتابه او غړو د ارزښتناکو هڅو، د چاپېریال د سمسورتیا او د نهالشانۍ په برخه کې د هغوی د پام وړ ونډې د قدردانۍ په موخه ستاینلیکونه ورکړل شول او د هغوی له دوامدارو خدمتونو څخه قدرداني وشوه.