وروستی
لغمان کې د غیر معیاري سپتیک څاهګانو د جوړولو مخنیوي په موخه څارنه ترسره شوه
۱۴۴۷ کال د ذوالحجې ۱۸نېټه/لغمان
د ځمکې لاندې اوبو ککړتیا د مخنیوي په موخه د لغمان ولایت د
چاپیریال ساتنې ریاست د نظارت او تفتیش ټیم له لوري د غیر معیاري جذبي کندو (سپټیک
څاهګانو) د جوړولو د مخنیوي په موخه د لغمان ولایت د کوتای تور په سیمه کې چاپیریالي
څارنه ترسره کړه.
یاده څارنه وروسته له هغې ترسره شوه چې د سیمې چاپیریالي
رضاکارانو د یو شمېر غیر معیاري جذبي څاهګانو د جوړېدو په اړه د چاپیریال ساتنې ریاست
ته خبر ورکړ. د خبرتیا له ترلاسه کېدو وروسته د ریاست د نظارت او تفتیش ټیم سیمې
ته ورغی او د یادو جذبي څاهګانو د جوړولو مخه یې ونیوله.
غیر معیاري جذبي څاهګانې د ځمکې لاندې اوبو د ککړتیا، د
خاورې د زیانمنېدو، د بد بوی د خپرېدو او د بېلابېلو ساري ناروغیو د رامنځته کېدو
لامل ګرځي. په ځانګړي ډول هغه غیرمعیاري سپتیک څاهګانې چې د څښاک اوبو ته نېږدې جوړې شي، د اوبو د ککړتیا او د خلکو د
روغتیا لپاره جدي ګواښ ګڼل کېږي.
همدارنګه د لغمان چاپیریال ساتنې ریاست د اطلاعاتو او عامه
پوهاوي مدیریت له لوري د سیمې له ګذر وکیل، د جومات له امام او اوسېدونکو سره د
عامه پوهاوي غونډه ترسره شوه او د غیر معیاري جذبي څاهګانو د زیانونو په اړه د
خبرتیا پاڼې هم ووېشل شوې.
د چاپیریال ساتنې عمومي اداره له ټولو هېوادوالو غوښتنه کوي
چې د چاپیریالي اصولو په پام کې نیولو سره معیاري سپټیک څاهګانې جوړې کړي؛ ترڅو د
ځمکې لاندې اوبو د ککړتیا مخنیوی او انساني روغتیا ساتنه وشي.