وروستی
د (UNDP) مسوولین: موږ هڅه کوو چې له افغانستان سره خپلې مرستې پراخې کړو
۱۴۴۷کال د ذوالقعدې ۲مه نېټه/ کابل
د چاپېریال ساتنې ملي ادارې عمومي رئیس الحاج مولوي مطیع الحق خالص د چاپېریالي
موضوعاتو په تړاو د خپلو لیدنو په لړ کې نن یکشنبه د ۱۴۰۵کال د وري په ۳۰مه نېټه،
افغانستان کې د ملګرو ملتونو د پراختیایې پروګرام (UNDP)له استازو ښاغلی سرګي وولکوف او نجیب الله یوسفي او همدا
راز د رها مؤسسې له مرستیال انجنیر عزت الله صدیقي سره په خپل کاري دفتر کې وکتل.
په دې لیدنه کې د افغانستان د چاپېریالي وضعیت په تړاو د چمتو شوي ملي راپور د مخکتنې؛
دوو چاپېریالي پروژو د تطبیق او GEF-9 غونډې په هکله هر اړخیز بحث او خبرې وشوې.
د چاپېریال ساتنې ملي ادارې عمومي رئیس الحاج مولوي مطیع الحق خالص د مېلمنو هرکلی
وکړ او په خپلو خبرو کې یې وویل چې د چاپېریال ساتنې او اقلیمي بدلون سره د سازښت
په برخه کې د (UNDP) کارونه قابل د قدر دي؛ ځکه په دې برخه کې دوی کافي تجربه
لري او هیله یې وښوده چې چاپېریالي مسایلو ته باید ډیره پاملرنه وکړي.
د ملګرو ملتونو د پراختیایې پروګرام د اقلیم بدلون څانګې مسوول ښاغلي سرګي وولکوف
د چاپېریال ساتنې ملي ادارې له عمومي رئیس څخه مننه وکړه او زیاته یې کړه: سره له
دې چې افغانستان له ډیرو چاپېریالي ستونزو سره مخ دی؛ خو ډیر فرصتونه هم لري. نوموړي
ټینګار وکړ چې په ګډه همغږۍ سره باید له موجوده فرصتونو څخه کار واخیستل شي. ده
ژمنه وکړه چې (UNDP) به هڅه وکړي؛ ترڅو له افغانستان سره خپلې مرستې پراخې او په
ګډه کار وکړي.
د ناستې په لړ کې پر مهمو چاپېریالي موضوعاتو هر اړخیزې خبرې اترې وشوې او عمومي
رئیس غوښتنه وکړه چې د چاپېریالي پروژو په تطبیق کې باید زیات دقت وشي او د کارونو
مؤثریت او مثمریت ته دې جدي پاملرنه وشي.
ښاغلي خالص د (UNDP) له مسوولینو غوښتنه وکړه چې د چاپېریالي پروژو د ارزونې
لپاره باید د یوه تخنیکي ټیم د څارنې زمینه مساعده کړي؛ ترڅو د پروژو مؤثریت او
مثمریت تثبیت او مخکې قدمونه واخیستل شي.
په پای کې دواړو خواوو د ګډې همکارۍ او همغږۍ په پیاوړتیا ټینګار وکړ او هوکړه
وشوه چې د چاپېریالي پروژو د تطبیق په هکله به تخنیکي ټیمونه خپل کار ته ادامه ورکړي
او د موجوده ستونزو د هوارولو لپاره دې مناسبې حل لارې چارې ولټول شي.