وروستی
د ګچ پزۍ بټیو د معیاري کولو په موخه مشورتي غونډه ترسره شوه
۱۴۴۶کال
د ذوالقعدې ۷مه
نېټه/ کابل
د چاپېریال ساتنې ملي ادارې مالي او اداري معین مُلا سعدالدین
سعید تر مشرۍ لاندې د ګچ پزۍ بټیو د معیاري کولو په موخه نن دوشنبه د روان ۱۴۴۶کال د ذوالقعدې په ۷مه نېټه د کابل ښار د ګچ پزیو
بټیو له مالکینو سره د دې ادارې د بند امیر غونډو په تالار کې مشورتي غونډه ترسره
شوه.
په دې غونډه کې د کابل په ارغندې سیمه کې د شاوخوا ۳۴ ګچ
پزیو بټیو مالکینو ګډون کړی وو چې د فعالیتونو د معیاري کولو په تړاو یې هر اړخیز
مشورتي بحث او خبرې وکړې.
د چاپېریال ساتنې ملي ادارې مالي او اداري معین مُلا سعدالدین
سعید په خپلو خبرو کې وویل: اسلامي امارت نه غواړي چې هیڅ صنعت کار ته زیان ورسوي،
بلکې غواړي چې خپلو خلکو ته په هره برخه کې اسانتیاوې برابرې کړي.
نوموړي ټینګار وکړ چې هیچا ته به اجازه ور نه کړي چې د هوا،
اوبو او خاورې د ککړتیا لامل شي او په ټوله کې چاپېریال ته زیان ورسوي.
د ګچ پزۍ بټیو مالکینو له مسوولینو غوښتنه وکړه چې دوی ته ځمکې
ورکړي؛ ترڅو وکولی شي خپل فعالیتونه له سنتي اړخ څخه صنعتي هغه ته واړوي؛ ترڅو
وکولی شي خپل فعالیتونه معیاري او په بشپړ ډول چاپېریالي اصولو تطبیق کړي.
د چاپېریال ساتنې ملي اداره هڅه کوي چې ټول هغه فعالیتونه چې
د اوبو، هوا او خاورې ککړتیا لامل کیږي، هغه له ښارونو څخه لېرې ولیږدوي؛ ترڅو
وکولی شي هېوادوالو ته پاک او خوندي چاپېریال رامنځته شي.