وروستی
د نیم میلیون ډالرو په ارزښت ۱۴ چاپېریالي پروژې منظور شوې
د چاپېريال ساتنې ملي ادارې عمومي رئيس، شاه زمان ميوندي په مشرۍ د کوچنیو مالي مرستو پروګرام (SGP) د رهبرۍ کمېټې ، د ۱۳۹۸ کال د لړم په ۱۶مه نېټه د دې ادارې د بند امير د غونډو په تالار کې ناسته وکړه.
په دغه ناسته کې د چاپېريال ساتنې ملي ادارې مسلکي معين، انجينير عزت الله صديقي، د ملګرو ملتونو د پراختیایي ادارې UNDP مرستيال، د کابل پوهنتون استادانو، د اړوند دولتي ادارو استازو او مدني ټولنو غړیو ګډون کړی وو.
د غونډې په لومړې برخه کې د غرني پړانګ د ساتنې په اړه، په تېره اونۍ کې د وړاندیز شوو درې طرحو په اړه ګډونوالو بحث وکړ او همدا راز په نننۍ غونډه کې د مدني ټولنو له خوا درې نورې طرحې هم وړاندې شوې او له هر اړخیز بحث وروسته د کمېټې د غړو له خوا شپږ واړه طرحې تائید شوې چې دوې به په نورستان او پاتې څلور په بدخشان، واخان او ملي پارک کې پلې شي، د یادو پروژو لګښت کابو دوه سوه زره امریکایي ډالرو ته رسیږي چې چارې به یې له اداري پړاو وروسته په عملي توګه پیل شي.
د غونډې په دویمه برخه کې د مختلفو چاپېریالي موضوعاتو په تړاو د ۱۱ وړاندیز شویو طرحو په اړه معلوماتي پرزنتیشنونه وړاندې شول او له دې جملې څخه یې ( ۸ ) طرحې تائید شوې چې ټولټال بودیجه یې درې لکه او لس زره ډالرو ته رسیږي.
د يادونې وړ ده چې د کوچنیو مالي مرستو پروګرام SGP پروژې چې د چاپېريالي اسانتياوو نړيوال پروګرام GEF لخوا تمويل کېږي، د ملګرو ملتونو پراختيايي پروګرام UNDP په تخنیکي همکارۍ د چاپېريال ساتنې ملي ادارې تر رهبرۍ لاندې د مدني ټولنو بنسټونو له خوا په بدخشان، نورستان، کونړ، بامیانو او کابل ولایتونو کې پلې شي.
خبریال: عبدالولي عابد
عکاس: سید امید سادات