وروستی
د زرغون اقلیم مالي صندوق د همغږۍ ميکانيزم او اقلیمي بدلون د معلوماتي سیستم په اړه مشورتي غونډه تر سره شوه
د چاپېریال ساتنې ملي ادارې مسلکي معین انجینر عزت الله صدیقي په مشرۍ، د اړوندو ادارو له استازو سره د زرغون اقلیم مالي صندوق د همغږۍ ميکانيزم او اقلیمي بدلون د معلوماتي سیستم په اړه د روانې میاشتې پر۳۰مه نېټه د دې ادارې د تل پاتې پراختیا ریاست د ناستو په خونه کې غونډه تر سره کړه. ښاغلي صدیقي مېلمنو ته د ښه راغلاست ويلو تر څنګ، دغه پروژه د هېواد لپاره خوارا اړینه و بلله او زیاته یې کړه؛ افغانستان د هغو هېوادونو په لړ کې دی، چې د اقلیمي ستونزو تر خورا زیاتو اغېزو لاندې دی او لا هم د دغو ستونزو ښکار کیږي. دغه ستونزې نه یوازې دا چې پر هېواد اغېز لري؛ بلکي په عامه کچه کولای شي نورو هېوادونو ته هم خنډ رامنځته کړي. ښاغلي صديقي وويل: د دې ستونزو د حل لپاره په نړیوالو صندوقونو کې مالي امکانات شته؛ خو د دې امکاناتو د ترلاسه کولو لپاره باید همغږي موجوده وي؛ تر څو د دغو ستونزو لپاره له نړیوالو صندوقونو شته مالي امکانات تر لاسه کړو. ورپسې په افغانستان کې د ملګرو ملتونو سازمان د خوړو او کرنې پروګرام مرستيال محمد اقا د خپلو خبرو په ترڅ کې داسې وویل: افغانستان د اقلیمي بدلونونو څخه اغېزمن هېواد دی او هغه هېوادونه چې د دغو بدلونونو ښکار شوي، دا ورته ښه فرصت دی، چې دغې ستونزې ته د یوې هر اړخیزه همغږۍ پر مټ د پای ټکی کیږدي. د دې مشورتي غونډې په وروستۍ برخه کې د ادارې تخنيکي کارکوونکو د همغږۍ ميکانيزم د اتلس میاشتني پلان او اقلیمي بدلون د معلوماتي سیستم په اړه خپل پريزېنټېشنونه وړاندې کړل او غونډه د ګډونوالو لخوا د نظریاتو په وړاندې کولو سره پای ته ورسېده.