وروستی
د ملي پارکونو، ساتل شوو سیمو او ځنګلونو د ساتنې په تړاو غونډه وشوه
۱۴۴۵کال
د جمادي الاول ۲۲مه/
کابل
د چاپېریال ساتنې ملي ادارې پالیسي او مسلکي معین ډاکټر زین
العابدین عابد په مشرۍ د دې ادارې د بند امیر د غونډو په تالار کې د ملي پارکونو،
ساتل شوو سیمو او ځنګلونو د ساتنې په تړاو مشورتي غونډه وشوه چې پکې دې ادارې د طبیعي
میراثونو د ساتنې او پلان رئیسانو، متخصصینو، د کرنې، اوبو لګولو او مالدارۍ وزارت
د طبیعي سرچینو د ساتنې عمومي رئیس او ورسره پلاوي ګډون کړی وو.
غونډه د قران عظیم الشان د مبارکو آیتونو په تلاوت پیل شوه
او ورپسې د دې ادارې پالیسي او مسلکي معین د ملي پارکونو، ساتل شوو سیمو او ځنګلونو
په برخه کې د شته ستونزو او فرصتونو په هکله خبرې وکړې او ویې ویل: د ځنګلونو ساتنې
ته باید جدي پاملرنه وشي ځګه دا د افغانستان ملي سرمایه ده.
ښاغلي عابد زیاته کړه: د ملي پارکو او ساتل شوو سیمو د ساتنې
او ځنګلونو د بیا رغونې لپاره باید ګډ کاري ټیمونه جوړ شي او په مرکز او ولایتونو
کې باید د چاپېریال ساتنې ملي ادارې او کرنې وزارت ریاستونو تر منځ همغږي او
همکاري پیاوړې شي.
په دې غونډه کې دواړو خواوو د ګډې همکارۍ او همغږۍ ژمنې وکړې
او هوکړه وشوه چې د ملي پارکونو، ساتل شوو سیمو او ځنګلونو د ارزونې لپاره به ګډ
کاري ټیم جوړ شي؛ ترڅو موجوده ستونزې حل او افغانستان د چاپېریال ساتنې سربېره د ګرځندوی
په برخه کې د پام وړ پرمختګ وکړي.