په ننګرهار کې د چاپېریال نړیواله ورځ د یوې لویې غونډې په ترڅ کې ولمانځل شوه

۱۴۴۴کال د ذی القعدې ۱۷مه - ننګرهار
د ننګرهار ولایت د چاپېریال ساتنې رياست د ولایت مقام او الفلاح پوهنتون په همغږۍ د سوېډن کمېټې او DRC موسسې په همکارۍ د چاپېریال نړيواله ورځ (د پلاستیکي ککړتیا پر وړاندې مبارزه) تر شعار لاندې د الفلاح پوهنتون د غونډو په تالار کې ولمانځله، په دې لمانځغونډه کې د ولایت مقام استازي او چاپېريالي چارو کارپوه سید روح الله پاچا، د چاپېریال ساتنې رئیس انجینر فېروز محمدزئي، د الفلاح پوهنتون مسوولینو او محصلینو او د یادو موسسو مسوولینو ګډون کړی وو.

د چاپېريال ساتنې رئیس د یادې ورځې پر تاريخچې سربېره د چاپېريال په ساتنه کې د خلکو ونډې او مسوولیتونو په هکله هر اړخیزې خبرې وکړې او په دې برخه کې یې د خلکو د پوهاوي کچې لوړولو په موخه لازمې سپارښتنې او معلومات وړاندې کړل.
هغه له ټولو هېوادوالو، په ځانګړي ډول ځوانانو، محصلينو او له ټولو ولسونو غوښتنه وکړه، چې چاپېریال ساتنې ته جدي پاملرنه وکړي او د ځنګلونو، ژوندبڼو، طبیعي سرچینو په ساتنه، د هوا او اوبو د ککړتیا په مخنیوي کې د چاپېریال ساتنې ریاست سره هر اړخیزه همکاري وکړي.

 ورپسې د ننګرهار ولایت مقام استازي د چاپېریالي ستونزو په هکله ګډونوالو ته معلومات وړاندې کړل او له ټولو یې غوښتنه وکړه چې په چاپېریال ساتنه کې ونډه واخلي او له طبیعي سرچینو څخه یې په ګټورې استفادې ټینګار وکړ.

په پای کې د سوېډن کمېټې او ډي، ار، سي موسسې مرسته شوي کېټونه او د پلاستیک د استعمال د مخنیوي په موخه ټوکرینو کڅوړې پر ګډونوالو ووېشل شوې.

Jun 6, 2023