وروستی
د اقلیمي بدلون نړیوالو مالي میکانیزمونو په تړاو د اړوندو ادارو کارکوونکو ته شپږ ورځنی روزنیز پروګرام جوړ شو
۱۴۴۴کال د جمادي الثاني۱۷مه/ کابل
د چاپېریال ساتنې ملي ادارې له خوا د اوبو او انرژۍ او کلیو پراختیا او بیارغاونې وزارتونو د انجنیرۍ ټیمونو ته له اقلیمي بدلون سره د سازښت او مبارزې په برخه کې د موجوده نړیوالو مالي میکانیزمونو: د اقلیم زرغون صندوق (GCF) د سازګارۍ صندوق (AF) او نړۍوالو چاپېریالي اسانتیاوو (GEF) په تړاو شپږ ورځنی روزنیز پروګرام پیل شو.
غونډه د قران عظیم الشان د مبارکو آیتونو په تلاوت پیل او د چاپېریال ساتنې ملي ادارې عمومي رئیس حافظ عزیزالرحمن د نړۍوالو مالي میکانیزمونو په هکله خبرې وکړې او ویې وویل: په دولتي ادارو کې د موجوده کدرونو ساتل او وخت په وخت د هغو د ظرفیت لوړول د اسلامي امارت له لومړیتوبونو څخه دي.
ښاغلي حافظ زیاته کړه: د دې روزنیز پروګرام د جوړولو موخه دا ده چې موږ څنګه کولای شو نړۍوالو مالي میکانیزمونو ته لاسرسی ومومو، خپلې وړاندیز شوې طرحې چمتو او په سمه توګه یې تطبیق کړو. نوموړي له ګډونوالو وغوښتل چې له دې روزنیز پروګرام څخه اعظمي ګټه واخلي.
ده وویل: اوس مهال اقلیمي بدلون نړۍواله مسئله ده چې افغانستان ترې هم اغېزمن هېواد دی، د چاپېریال ساتنې ملي اداره هڅه کوي چې اړوندو ادارو، خصوصي سکټور او اکاډمیکو بنسټونو د کارکوونکو ظرفیت لوړ کړي؛ ترڅو وکولی شو د اقلیمي بدلون په برخه کې مرستې ترلاسه کړو.
د یادولو وړ ده چې یاد روزنیز پروګرام به شپږ ورځې ادامه ولري او د دې ادارې د متخصصینو له خوا به د اقلیمي بدلون سره د مبارزې او سازښت په برخه کې د موجوده مالي میکانیزمونو څخه د پیسو ترلاسه کولو د څرنګوالي په هکله ګډونوالو ته معلوماتي پرزنټېشنونه وړاندې شي.