وروستی
په ننګرهار کې دوه بازان د ښکاریانو له منګولو خلاص او آزاد شول
۱۴۴۴کال د ربیع الاول ۲۶مه- ننګرهار
د ننګرهار ولایت د ګمرک ریاست مسوولینو لخوا په طورخم بندر کې دوه دانې بازان چې بهر ته قاچاق کیدل، د ښکاریانو له منګولو خلاص او د ننګرهار ولایت د چاپېریال ساتنې رياست ته سپارل شوي وو چې د دې رياست په وړاندیز او ولايت مقام د ۱۴۴۴/۳/۲۴ نېټه حکم په اساس د ګډ هئيت په شتون کې آزاد شول.
ياد الوتونکي خورا ارزښتمن دي او د چاپېریال ساتنې ملي ادارې د ساتني وړ وحشي ډولونو په نوملړ کې شامل او د ورکېدو له ګواښ سره مخ دي. د دې الوتونکو نسل بايد له منځه لاړ نه شي او د ساتنې لپاره یې ځانګړې پاملرنې ته اړتیا ده. همدا راز سوداګري او لېږد یې د چاپېریال ساتنې ملي ادارې له جواز پرته ناقانونه ده او هیڅوک نه شي کولی چې بهر ته یې انتقال کړي.
د ننګرهار ولایت د چاپیریال ساتنې رياست د طورخم ګمرک له مسئولینو او کشفي ارګانونو څخه مننه کوي چې د دې الوتونکو د قاچاق مخنيوی يې وکړ او په راتلونکي کې هم ترې غواړو چې بهر ته د نایابه، قیمتي او هغو الوتونکو چې نسل یې له ورکیدو سره مخ دی، د قاچاق مخه ونیسي.
همداراز ټولو هغه خلکو ته چې په ورته عمل لاس پورې کوي خبر ورکول کيږي چې په راتلونکي کې له ښکار او قاچاق څخه ډډه وکړي او څوک چې سرغړونه کوي له قانوني چلند سره به مخ شي.
نوټ: دا چې څو لسيزو جنګ جګړو زموږ د هېواد د نورو ارزښتمنو شتمنيو تر څنګ چاپيريالي شتمنۍ هم اغېزمنې کړي او له ګواښ سره مخ دي، د دی لپاره چې د نورو شتمنيو ترڅنګ مو چاپيریالی شمتنۍ لا غني او بډایه شي له ټولو هېوادوالو څخه هيله کوو چې د الوتونکو او نورو وحشي حيواناتو د ښکار، قاچاق او ځنګلونو د وهلو څخه ډډه وکړي او د يوه پاک او سمسور چاپېریال لپاره په ګډه لاس په کار شو.