وروستی
د مرستو د جذبولو په اړه د چاپېریال ساتنې ملي ادارې او په ملګرو ملتونو سازمان کې د افغانستان د دایمي استازي ګډه ژمنه
کابل 1400 د چنګاښ ۹مه
د چاپېریال ساتنې ملي ادارې عمومي رییس؛ پښتون عاطف نن (چهارشنبه د ۱۴۰۰ د چنګاښ ۹مه) تر غرمې مخکې په ملګرو ملتونو سازمان کې د افغانستان د دایمي استازي؛ ښاغلي غلام محمد اسحاق زي سره وکتل.
په دې لیدنه کې دواړو خواوو د چاپېریال ساتنې، له نړۍوالو بنسټونو سره د اړیکو پراختیا او د مالي مرستو د جذب په اړه خبرې وکړې.
د چاپېریال ساتنې ملي ادارې عمومي رییس وویل چې د چاپېریال ساتنې په برخه کې د نړۍوالو مرستو د جذبولو لپاره د یوې مشخصې کړنلارې رامنځته کول؛ د دې ادارې له لومړيتوبونه څخه دی او هڅه کېږي چې د افغانستان د اسلامي جمهوریت او هغو نړۍوالو کنوانسیونونو، چې افغانستان یې غړيتوب لري، د کړنلارې او ستراتېژۍ په پام کې نیولو سره د نړۍ والو او مرسته کوونکو بنسټونو پام د افغانستان چاپېریالیز وضعیت ته راواوړي.
ښاغلي عاطف په چاپېریال ساتنې ملي اداره کې د ظرفیت لوړولو ته په اشاره وویل؛ چې د نړۍوالو مرستو د جلبولو لپاره یوې فعالې چاپېریالیزې ډيپلوماسۍ ته اړتیا ده او دا چاره د نورو دولتي بنسټونو، په ځانګړې توګه په ملګرو ملتونو سازمان کې د افغانستان د دایمي استازولۍ په ګډه همکاري امکان پيدا کوي، ترڅو له یو واحد ادرس نه افغانستان ته لابي وسي.
له بلې خوا په ملګرو ملتونو کې د افغانستان دایمي استازي ژمنه وکړه؛ چې د چاپېریال ساتنې ملي ادارې له مشرتابه سره به د نړۍوالو مرستو په جلبولو کې مرسته کوي. ښاغلي اسحاق زي وویل چې په ملګرو ملتونو سازمان کې به د افغانستان لپاره د چاپېریالیزو نړۍوالو مرستو د جذب په موخه لابي وکړي؛ ځکه دا د ټولو اړوندو بنسټونو ګډ مسوولیت دی او باید په ګډه کار ورته وسي.