وروستی
د اقلیمي بدلون نړۍواله اونۍ او غرني پړانګ نړۍواله ورځ ولمانځل شوه
پنجشیر- ۱۳۹۹د لړم ۵مه
د اقلیمي د بدلون نړیواله اونۍ د "فکر ، تعهد او عمل" تر شعار لاندې د پنجشیر ولایت د والي انجنیر کماالدین نظمامي، د چاپېریال ساتنې ملي ادارې مالي او اداري چارو معین محمد یوسف حمیدیان، د وحشي ژویو د ساتنې موسسې رییس، د ولایتي شورا غړو ، د پروان، پنجشیر او کابل د چاپېریال ساتنې رییسانو، د پوهنتون استادانو او مدني ټولنو غړو په ګډون سره ولمانځل شوه.
د غونډې په پیل کې د چاپیریال ساتنې ملي ادارې مالي او اداري معین محمد یوسف حمیدیان وینا وکړه ویې ویل: اقلیمي بدلون په ټولنه زیان رسونکې اغیزې واردې کړې، چې ورستۍ بېلګې یې د سېلابونو راوتل، د طبیعي یخچالونو ویلې کېدل او په هېواد کې له خپلو اوسېدن ځایونو او مېنو څخه د هېواد والو بې ځایه کېدل او کډوالي ده.
ښاغلي حمیدیان زیاته کړه: دغه اداره له اقلیمي بدلون سره د سازښت او د هغو د اغېزو د مخنیوي په پار د بشري سرچینو ظرفیت قوي کړی دی، د سکتوري ادارو تر منځ هماهنګي زیاته شوې او د اقلیم زرغون صندوق څخه د مالي سرچینو د تر لاسه کولو په موخه پروژې پلې شوې اوپلې کېږي.
د یادې ادارې مالي او اداري معین د خپلو خبرو په اوږدو کې د پنجشیر ولایت له خلکو غوښتنه وکړه، چې د وحشي ژویو او چاپېریال په ساتنه کې له یادې ادارې سره همکار پاتې شي.
ورپسې د پنجشیر والي انجنیر کمال الدین نظامي د اقلیمي بدلون په برخه کې د دې ته ورته برنامو پلي کول د عامه پوهاوي لوړولو لپاره اړینې وبللې ویې ویل: اقلیمي بدلون جدي ګواښ دی، چې زموږ خلک په شدت سره زیانمنوي.
ښاغلي نظامی زیاته کړه: د شخصي ګټو لپاره د ځینو ډلو او خلکو لاسوهنه د دې سبب شوې، چې چاپېریال ساتنې ته زیان ورسوي، اړینه ده چې ټول باید د چاپېریال ساتنې او وحشي ژویو په ساتنه کې ځانګړې پاملرنه وکړو.
همدارنګه په یاده غونډه کې د ولایتي شورا معاون، د بنجشیر او کابل ولایت د چاپېریال ساتنې رییسانو، پوهنتون استادانو د اقلیمي بدلون، ژوند بڼو او په ځانګړې توګه د واورین پړانګ په اړه خبرې وکړې یاده غونډه د پوهنتون استادانو او چاپېریال ساتنې متخصصینو د پرېزنتېشنونو په وړاندې کولو سره پای ته ورسېده.